李斯特城扑「錘」氹fans

猪拉多纳

23/04/2012
文： 力奇

英冠尾二一輪賽事，今晚會上演最後一場獨腳戲，由李斯特城主場迎戰韋斯咸。主隊依家高不成、低不就，但打風流波勝在冇乜負擔，反而「錘仔幫」要開始為升班附加賽留力，未必去盡，平手盤梗係捧主隊李斯特城啦！（開賽時間：周二凌晨2：45）


先講講英冠現時形勢，由於修咸頓剛戰輸波，未能提早確認升班資格，變相令打少一場而又落後5分嘅韋斯咸重燃直接升班希望，不過「錘仔幫」擁躉又唔好開心得咁早住，事關「聖人」最後一場聯賽嘅對手，只係篤定降班嘅高雲地利，以修咸頓強勁嘅主場威力，都幾難唔全取3分，所以韋斯咸基本上都可以疊埋心水等踢升班附加賽，就連領隊艾拿戴斯都話最後兩輪嘅目標，就係唔想班球員受傷，有所顧忌兼作客出擊，真係玩唔過o架！

李城近10次主場7勝3和

至於喺季初大灑金錢積極增兵嘅李斯特城，本來係升班熱門之一，點知踢落唔多對辦，一直只能喺中游徘徊，去到尾二呢輪已經肯定升班無望，雖然今仗仲有尼爾丹斯養傷，不過力奇仍然對佢哋投下信心一票，皆因呢班球員都仲顧吓些少面子，喺季內最後一次主場賽事，點都要交貨畀一眾球迷，睇番佢哋近10場主場就取得7勝3和佳績，試問今晚又點會驚韋斯咸先？