奧格斯堡搶分受讓抵玩

猪拉多纳

22/04/2012
文： 力奇

經歷2連敗嘅史浩克04今晚會喺德甲出訪弱旅奧格斯堡，以為佢哋可以反彈贏波，全力保住個歐聯參賽席位咩？恐怕唔易！力奇認為史浩克狀態真係唔多掂，啱啱仲爆埋魯爾季尾離隊單消息，對軍心又有多少影響，最慘係佢哋作客戰績真係麻麻，今鋪史浩克咁都要讓平半，我都係寧願敲對家1.92倍下盤。（有線61、64及204周日晚9：30直播）

奧格斯堡近7戰僅1敗

目前排喺德甲聯賽榜第3嘅史浩克，本來計實力肯定遠喺奧格斯堡之上，不過唔知係咪同佢哋之前喺歐霸盃畀畢爾包打殘有關，連埋歐霸盃在內，近6戰竟然只得1勝2和3負劣績，真係衰到冇朋友。佢哋今仗會有守將基斯甸富治斯停賽，唔多唔少對防守有影響，再睇埋佢哋近9場作客波只贏得1場，要讓波真係捧唔過o架！


奧格斯堡呢邊，依家排喺聯賽榜尾4，再跌一格就要踢留級附加賽。雖然話依家奧格斯堡帶甩尾3嘅科隆4分，查實都係一樣唔搏唔得！上星期佢哋作客以2：1力克禾夫斯堡，成功終止2連敗頹勢，球員信心唔多唔少都會有提升，加埋佢哋主場近7戰都只係輸1場，今晚頂得住唔輸有乜出奇先？