祖記落重手首都狼「大」難臨頭

猪拉多纳

22/04/2012
文： 鄭少偉

上星期利禾奴球員摩路仙尼戰死沙場，分屬同行嘅「亨利」睇見都乸住乸住，希望佢可以喺天國安息，同保佑所有球員身體健康啦！今晚意甲戰火重燃，榜首嘅祖雲達斯將會喺主場大戰「首都狼」羅馬，祖記要保住榜首位置不容有失，咁啱羅馬防線唔穩陣，「亨利」預佢哋會大手交易，一於取1.72倍入球大，再補多個2.2倍「讓球主勝」就弗晒喇！（now633及660台周一凌晨2：45直播）


呢場大戰嘅焦點會落喺兩大巨星「金童」迪比亞路同「王子」托迪身上，迪比亞路季後就會離開祖記，今場極可能係兩位殿堂級球員嘅最後對決，兩位名將一直陪伴住唔少好似亨利咁嘅「踢波仔」成長，亦係街場嘅模仿對象，今戰可以話係「有今生，冇來世」！

羅馬近8次作客輸6場

入番正題，雖然祖記近4場聯賽贏晒，但係佢哋只係僅僅領先次席嘅AC米蘭1分，如果有咩差池就隨時再畀對方反先。不過祖記今晚只要贏波就輕鬆得多，事關打後5戰有3場對手都係對榜尾分子，以祖記嘅實力絕對有力連勝，唔好唔記得仲有愈老愈可愛嘅迪比亞路，上場又係靠佢後備落場入波絕殺拉素，「金童」近排腳風咁順，有佢就唔怕冇波入喇！


對家羅馬話明係「首都狼」，最叻當然係喺首都作賽，不過一「出城」就冇料到，睇佢哋近8次作客輸咗6場，前面入幾多粒都唔夠後面輸，正式係有前冇後，打死罷就，今晚仲要作客三線都咁平均嘅「斑馬兵團」，羅馬真係凶多吉少架！

橫數千軍

 祖記未破聯賽不敗身


‧今季32場意甲保持不敗，為歐洲5大聯賽唯一不敗之師。

‧經歷聯賽4連和後近5場聯賽全勝，當中只係失過1球。

 羅馬入波靠奧斯華度

‧近14戰得1場交白卷，射手奧斯華度近5戰有4場取得入球。

‧近8次作客僅取得1勝1和6負，當中只得1場保住清白身。