曼城月黑屠狼

猪拉多纳

22/04/2012
文： 蘇豪

曼城阿根廷殺手組合泰維斯同阿古路正處於瘋癲狀態，兩人聯手出擊威力倍增，已經連續兩場協助球隊屠殺對手，今輪曼城揮軍造訪毫無還擊之力嘅狼隊，勢將再次血流成河，蘇豪熱捧「讓球客勝」！（有線300及200台周日晚11時直播）


自從泰維斯解凍重返正選陣容後，曼城好似變咗另一隊波咁，前仗主場4比0大炒西布朗，上場作客6比1屠殺諾域治，兩場加埋入十粒，泰維斯獨建四功，阿古路好似唔抵得泰維斯搶晒鏡，對上兩戰加埋都係入四球，兩位阿根廷前鋒亦敵亦友，陣上擦出強烈火花。曼城重拾驚人火力，一切都要多得前鋒巴洛迪利坐波監，佢停埋今場就復出，大軍必定會盡快享受沒有「腦殘」的日子。

狼隊防線千瘡百孔

曼城現階段有幾勁毋須再花時間形容，睇吓佢哋對手有幾渣好過啦！狼隊聯賽主場八連敗，先後畀利物浦、西布朗、曼聯及阿仙奴等球隊大炒，現時深陷榜尾位置，確係實至名歸。狼隊能夠衰成咁，實在有賴一條發揮極不穩健嘅豆腐防線，每個球員都係計時炸彈，中堅巴桑早前對阿仙奴領紅做完罪人，依家仲有正選門神軒尼斯受傷長抖，要佢哋唔失波簡直係不可能的任務，今仗對住曼城淨輸兩粒係基本消費！