阿仙奴車路士「大」晒冷

猪拉多纳

21/04/2012
文： 阿占

倫敦「大」戰今晚爆發！阿仙奴主場迎戰車路士，直接關乎英超前4位置。「槍王」尹佩斯首循環狂轟車仔3球，信心爆棚；反觀藍戰士近期雖然連場硬仗，但球員一鼓作氣踢出大無畏精神，連巴塞隆拿都畀佢哋砌低，既然兩隊都火氣十足，今場玩1.75倍入球大穩陣。（有線200、204及300周六晚7：45直播）


阿仙奴上場無端端輸畀韋根，搞到原先好穩陣嘅前4位置再現危機，雲格賽前已表明今場唔贏唔得。呢隊兵工廠目前最大問題就係唔穩定，之前贏過曼城、紐卡素同熱刺等等，霸氣十足，但對弱旅就不時甩拖！今晚硬撼車路士，賽前話阿迪達受傷要抖6至8星期，意味住佢提早收咧，而班拿約又因以借將身份唔能夠倒戈，但小弟相信班「小兵」會再發揮高水準，只要踢番贏曼城嗰場水銀瀉地攻勢，入波就冇難度。

收起杜奧巴 大衞雷斯

雖然唔少球迷擔心尹佩斯近期腳風差，不過小弟就唔係咁睇，佢好多球都係中柱、中楣或者畀人救空門，起碼已經中目標啦！但今場對手車路士絕對係尹佩斯個人今季最佳回憶之一，首循環佢連中三元帶領阿仙奴贏5：3，今場肯定想重溫好夢。


至於暫列第6位嘅車路士，周中歐聯4強首回合同巴塞激戰贏1：0，不過就算幾辛苦都好，佢哋喺國內聯賽為咗上番前4，除每場要同對手死過之外，已經無第二條出路，呢場一定要攞晒3分。就算今場佢哋會收起杜奧巴、大衞雷斯畀佢兩個休息、但仲有重拾射門鞋嘅費蘭度托利斯可用，加上林柏特同桑馬達愈踢愈有，要搶攻亦一樣夠本錢，今晚有望繼續做「大」騷！

頂占筍盤：阿仙奴（入球大）

有線球彩台主持阿占


電郵：soccer64@cabletv.com.hk

PHONE波熱線：1831 678

「超級星期六」開放時間：周六晚9：00至周日凌晨2：30

橫數千軍

兵工廠主場例有波入

過去16次英超主場賽事都有波入。

近8場聯賽只得1次半場開0：0，其餘7次都有入球交收。

車仔後防尾段唔集中

對上19次喺聯賽造訪阿仙奴只贏過3次。

最後15分鐘失球數字冠絕英超，總共18球。