巴塞焗攻 皇馬「客勝」睇定食

猪拉多纳

21/04/2012
文： 鄭少偉

全城球迷引頸以待嘅矚目大戰—西班牙國家打吡今晚終於爆發！「地上最強」巴塞隆拿坐鎮無敵魯營主場，火併宿敵皇家馬德里，呢場關乎兩隊榮辱同今季西甲聯賽寶座最關鍵嘅生死戰，各位球迷又點可以錯過？亨利覺得巴塞呢場焗攻，隨時益咗皇馬，「讓球客勝」有2.4倍好抵玩！（now632台及廣東體育周日凌晨2：00直播）

巴塞落後4分壓力大

兩隊啱啱過去嘅周中都要踢歐聯4強首回合，結果都幾相似，同樣作客輸波，但睇得出佢哋都有留力博今晚呢場大戰嘅心態。皇馬目前喺西甲有4分優勢head住巴塞，睇落巴塞形勢都幾被動，就算今場贏波，仲要望皇馬之後失分先可以後上封王，相反今場一輸就幾乎冠軍幻滅，許勝不許和，巴塞今晚焗住強攻皇馬，唔怪得賽前《阿斯報》消息話，哥帥會改打3後衞搏命啦。


雖然教練莫連奴執教皇馬之後對親巴塞喺法定時間都未贏過，數據好似窄咗啲，但有智者講過數據係拎嚟破嘅！今場「亨利」就睇好皇馬，無論心態同戰意上皇馬今場都唔使好似以前咁，一定要打低巴塞，壓力冇咁大應該會有更好發揮。

「天使」玩轉巴塞左路防線

巴塞公認全世界用波最好，今晚控球指數一定佢哋最高，但如果皇馬存心去守，要咬入佢哋其實都幾難。今場大戰會由球證安迪安奴執法，佢已經第6次吹國家打吡，經驗豐富，而佢過去5次執法，巴塞有3勝1和1負稍為佔優，不過睇番巴塞冇咗艾比度問題都幾嚴重，防線硬淨度下降，咁就算有球證「幫手」都未必Ｗ硬喇。


況且復出冇耐嘅「天使」迪馬利亞係皇馬今季助攻王，佢出名快兼傳中好，有佢喺對手左路邊線發難，隨時恰到巴塞得3後衞嘅陣式！再講巴塞今場要焗攻，後防肯定多咗好多空位，隨時會犯錯益咗皇馬，亨利覺得皇馬口「讓球客勝」真係幾穩陣，有信心博埋個客勝都仲得呀！

橫數千軍

巴塞美斯少開首球

今季西甲主場唯一不敗之師，獲15勝1和，勝率達94%。

美斯今季41個西甲入球，只得6球是首球。

皇馬西甲作客王

西甲作客王，獲13勝2和1負，勝率達81%。

近14次交手，在法定時間內未嘗1勝，獲5和9負。