喜鵲搶W玩歐聯 史篤城大劑

猪拉多纳

21/04/2012
文： 張志德

毫無疑問紐卡素係今季英超嘅「神奇球隊」。喺季前，有邊個諗到「喜鵲」可以挑戰來屆歐聯席位？睇吓紐記去年夏天買入嘅新球員，頂多只係二線貨色，領隊柏杜之前帶隊又冇乜佳作，就算於季初保持聯賽11戰不敗，但好多專業球評家仍然批死佢哋嗰段只係虛火。不過紐卡素以實際行動證明自己真係有料到。

兩大關鍵先生齊爆發

紐卡素愈踢愈有主要係喺1月轉會市場重開時買入柏比斯施斯，佢同法國中場賓艾化齊齊大爆發，兩位「關鍵先生」協助球隊近期取得聯賽5連勝，追到與熱刺同分，僅係因得失球差較曳列第5。


紐記個勢勒都勒唔住，今輪主場出擊鬥史篤城，大家都係唔好拗頸，主W1.57倍算係有分頭。史篤城季尾冇嘢好爭，而且聯賽作客7場不勝，試問又點會夠弗爆嘅「喜鵲」砌先？加上主隊要追得失球差，因此捧主W之餘，補埋個「大」亦可考慮。（有線300及200台周六晚10時直播）