格雷特霍夫和波是福

猪拉多纳

20/04/2012
文： ComboKing

今晚德乙FSV法蘭克福主場對格雷特霍夫值得留意，格軍只要攞一分，就可以提早取得升班資格。基於格雷特霍夫作客表現只屬一般，而FSV近五次主場不敗，屬於均勢之戰，而且今場打和，主隊既可保面子，客軍亦可達到升班目標，不失為好結局，阿King認為雙方會握手言和。（周六凌晨零時開賽）


德乙頭兩位球隊可以直接升上德甲，第三名需要踢升班附加賽，現時格雷特霍夫領先第三位柏達邦九分，換言之喺餘下三輪賽事只要再攞一分，下季就可以轉戰德甲。論實力格軍的確喺FSV之上，今仗贏面好似較大，但由於和波都可以升班，而且要作客出擊，唔需要特意贏波同球迷慶祝升班，相信格軍表現未必太進取。


FSV法蘭克福護級壓力唔大，但佢哋主場近五次取得三勝二和，包括同前列分子聖保利打和三比三，預料今次鬥榜首格雷特霍夫亦唔會太輸蝕，有望再保不敗。

施禾尼封王唔洗搏

荷乙方面，榜首施禾利已奪得冠軍，取得直接升班資格，餘下比賽已成例行公事，球員或已呈放假心態，今仗作客威廉二世，表現好可能走樣，捧主勝。另一場荷乙雲登主場對靴蒙特，靴蒙特已穩奪升班附加賽資格，估計亦唔會搏命，但雲登實力差兼狀態低迷，有主場都惡唔出樣，要入球細。