緬恩斯獵病狼

猪拉多纳

20/04/2012
文： 蘇斯黑柴

德甲獨腳戲緬恩斯主場迎戰禾夫斯堡，雙方目前喺聯賽都冇乜搶分壓力，今仗可以放開懷抱對攻，不過３連敗嘅「狼堡」禾夫斯堡近期禍不單行，陣營受流感侵襲，戰鬥力進一步削弱，作客唔夠緬恩斯砌，黑柴捧1.78倍主勝。


（有線64及204台周六凌晨２時30分直播）


緬恩斯近兩仗喺科隆同拜仁身上共搶4分，護級壓力已經唔大，但球隊士氣一流，今仗係39歲嘅杜曹執教緬恩斯第100場德甲賽事，球會上下同一眾戰將都對呢位少帥愛戴不已，決心以一場勝仗作賀禮。緬恩斯目前喺聯賽榜排12位，已經領先尾三嘅科隆８分，聯賽只餘下３輪，今仗贏波即可宣布護級成功，主場出擊當然希望雙喜臨門。

流感侵襲禾堡大營

禾夫斯堡近期３連敗，上仗主場對弱旅奧格斯堡，全場搏盡佔有壓倒性優勢，但最終畀對手完場前絕殺，認真洩氣，球隊爭奪來屆歐霸盃參賽資格嘅機會愈嚟愈渺茫，今仗賽前更接到壞消息，流感侵襲大營，陣中多名球員都中招，隊長麥龍、守將馬高盧斯同中場奧漢祖奧路斯高已肯定無緣在今仗上陣，甚至一雙正選箭頭希美斯同文迪蘇傑都抱恙在身，踢唔踢得要等賽前至知，今晚作客搶分機會並唔樂觀。