兵工廠恃地利拆「車」出氣

猪拉多纳

19/04/2012
文： 水哥

歐聯4強首回合啱啱打完，阿水既係球迷，亦為搵食，梗係睇晒兩場唔走雞啦！講起呢兩場波，出面莊家大玩花臣嘢，無論係賭烏龍波、首面紅黃牌、首次越位、首個罰球、首名換人、最後自由球……總之應有盡有，賭民肯定過足癮。


阿水問過班艇仔老友，其實呢類花臣嘢，除非一早搭通天地線，照計未必有人夠膽重錘去玩，對於外圍莊家幫補到幾多？班老友同阿水解釋，其實搞呢啲古靈精怪投X，主要係為谷起大賽氣氛，希望班客玩完得意嘢，順勢再買波，到時投X額一定會大啲。再唔係就吸引埋一啲平時少賭波嘅球迷，都會貪得意玩吓，話唔定可以開發吓更多市場。咁有生意頭腦，真係點到你唔服先？

車路士分心歐聯打巴塞

講番周末堆波，英超殺到入最後直路，真係好戲連場。曼市雙雄今周分途出擊，紅魔鬼主場鬥愛華頓，藍月亮就作客狼隊，睇怕都係實食冇黐牙，個盤都開得特別辣，因為莊家想趕客。另外嗰場阿仙奴對車路士，兵工廠勝在可以專心聯賽，又有地利，點都秤先啲，上輪輸完畀韋根，唔通唔搏命咩？反而車仔仲要分心打巴塞，信唔過o架！莊家開盤係阿仙奴讓平半同半球盤，阿水就鍾意上盤喇！