山度士賀百周年會慶延續「強」勢

猪拉多纳

19/04/2012
文： 走肖

100周年會慶咁大件事，當然要食住上繼續贏，日前巴甲球隊山度士喺主場慶祝球會成立百周年，狂數對手5蛋氹球迷開心，聽朝山度士喺南美自由盃A組主場對嚟自玻利維亞嘅強者，贏波就肯定可以出線，鬥心肯定爆棚，即使「-2」都要捧1.95倍「讓球主勝」。（開賽時間：周五早上6：45）

尼馬博轉會表現醒神

山度士會慶請到巴西球王比利坐直升機到賀，結果佢哋喺巴西州聯賽以5：0大炒卡坦度雲斯，所以球迷可以笑住離場。作為上屆自由盃冠軍，現時山度士喺A組得10分暫列榜首，只要呢場打沉得7分嘅強者，就可以肯定得到出線資格，試問又點捨得令擁躉失望呢？


可能臨近歐洲轉會市場重開，一心希望過檔巴塞隆拿或者皇家馬德里嘅山度士超新星尼馬，最近踢得特別醒神，日前對卡坦度雲斯又有士哥，加上中場甘素省入兩粒，依照現時山度士嘅攻擊線已經全面撻着，今屆自由盃踢5場勁入10球信得過。

強者作客例腳軟

對家方面，來自玻利維亞嘅所謂強者，首循環曾經借助高原主場威力，完場前入波爆冷砌低山度士，但作客依然係佢哋死穴，造訪國際體育會試過以0：5慘敗，作客魚腩祖安奧列治又輸0：1，而且代表過巴拉圭國家隊出戰嘅射手施巴斯坦干沙利斯已33歲，想搏都有心無力。


賽制：32支參賽球隊分8組進行雙循環分組賽，每組首、兩名躋身16強淘汰賽。


自由盃A組