馬體會無敵主場擒蝙蝠

猪拉多纳

19/04/2012
文： 朱楓

西班牙球隊喺歐霸盃4強佔3席，認真犀利，當中馬德里體育會同華倫西亞今晚會喺首回合上演「西甲內訌」。馬體會今屆喺呢項賽事主場超勁，加上有3名主力復出，迎戰「蝙蝠兵團」有力拔頭籌，吼實1.82倍主W！（有線61、64、201及204周五凌晨3:05直播）


由於同屬西甲，馬體會、華倫對對方一啲都唔陌生，但原來兩隊曾經喺前屆歐霸盃8強碰頭，最終馬體會憑作客入球出線，之後仲捧埋盃添！馬體會今屆歐霸盃早喺第3圈外圍賽已參戰，至今表現好對辦，只輸過1場，當中主場更錄得8戰全勝，今晚佔地利唔難攞頭威。

華倫聯賽吞4蛋洩氣

由於今場有高甸停賽，馬體會日前喺西甲作客華歷簡奴，特登唔派呢位中堅落場，結果最後贏1:0，相信今晚條防線應該唔會有太大問題，再加上8強次回合作客漢諾威停賽嘅中場阿達杜倫、基比同右閘桑法蘭托里斯今晚齊齊刑滿，為喺今屆歐霸盃已射入8球嘅射手法卡奧提供彈藥，馬體會可謂有齊所有贏波條件。


雖然今晚要出戰歐霸盃4強，但華倫西亞日前喺西甲作客愛斯賓奴仍保留7名主力應戰，點知最後竟然大敗0:4，都咪話唔影響士氣。此外，今屆歐霸盃中途以歐聯分組賽第3名身份加入嘅「蝙蝠兵團」，無論歐聯定歐霸盃作客戰績都麻麻，踢6場僅得1勝2和3負，預計今晚有右閘巴拿根停賽下，就算射手蘇爾達杜趕得切克服大腿肌肉受傷問題復出，想破馬體會主場金身都唔係咁易！

橫數千軍

馬體會西班牙內訌主場有計


‧歷來歐洲賽對西球會獲3勝2和4負，單計主場3勝1和。

‧歷來西甲主場對華倫獲33勝19和22負。

華倫歐戰作客勝率低

‧歷來歐洲賽對西球會獲6勝3和2負，單計作客2勝2和2負。

‧近9場歐洲賽作客僅得1勝4和4負。

賽制：歐霸盃4強採主客兩回合制，今輪為首回合，若兩回合總比數賽和，以作客入球較多一方為勝，若作客入球相同，則在次回合後加時30分鐘，若雙方在加時取得相同數量入球，由作客球隊獲勝，若加時沒有入球，則互射12碼分勝負。