西維爾平手盤筍到菲起

猪拉多纳

16/04/2012
文： 法達斯維

今晚西維爾又再負責把守西甲尾門，將會作客出戰基達菲，西軍有教頭米高倒戈，戰意鮮明，加上他們演獨腳戲極有心得，馬會開出平手盤非常筍，唔使讓波梗係捧西維爾。


（周二凌晨３時開賽）

加強中場砌基達菲

齋睇近績，基達菲近三場主場全勝，看似唔錯，但正因為連場搶到分，令他們護級壓力大減，於無目標下難免鬥心不足，就算今場主場出擊，都唔值得睇好。相反，西維爾經過一輪努力後，已爬到第七位，只要keep住呢個勢頭，相信會拿到下屆歐霸參賽資格，依家梗係唔會鬆懈。


另外，西維爾教頭米高教過基達菲多年，對基軍實力非常了解，由於主隊守強攻弱，米高會針對性加強進攻。以往西維爾常排出羅馬歷、索高拿等「有破壞冇建設」的防中，令球隊進攻時唔太流暢。但米高多用拿傑迪錫或杜查奧斯基任防中，夥拍「打手」加利美度，有利銜接前線，使攻勢更加入肉。


原來西維爾擅於打壓軸戰，近四次把守西甲尾門全勝，其中作客ＣＦ格蘭納達，該仗都係開平手盤，結果西維爾大勝三比○，今場格局相似，既然唔使讓波，不妨續捧西維爾。