華歷簡奴「主勝」抵玩

猪拉多纳

15/04/2012
文： 走肖

俗語話有得必有失，歐洲賽想捧盃、聯賽又唔想失分，邊有咁着數呀？華歷簡奴今晚喺西甲主場對馬德里體育會，「讓球主勝」抵博，因為馬體會要留力踢歐霸盃4強，呢場Hea踢絕對唔出奇，相反華歷簡奴嘅中場米捷話明想過檔曼聯搵大錢，有得騷哥利佢當然唔會腳軟。（now632台周一凌晨3：30直播）


前年馬體會歷史性稱霸歐霸盃前身歐協盃，最終聯賽排名只不過係第9位，依家佢哋幾乎冇機會爭入前4名踢歐聯，與其喺聯賽嘥彈藥爭下屆歐霸盃席位，不如依家搏盡爭冠軍好過啦！唔好忘記，馬體會嘅歐霸盃4強對手係華倫西亞，惡啃程度到達5粒星爆燈，假如今場亂搏搞到有球員受傷，就喊都冇謂。

米捷想過曼聯證身價

對家方面，華歷簡奴風流波味道更重，前列入唔到又唔憂會降班，不過佢哋嘅中場主力米捷，因為入球能力超強被曼聯睇中，今季佢已經有13個聯賽入球，有能力頂替史高斯喺曼聯嘅位置，而且米捷本人亦承認好希望登陸英超，有佢孭飛，照計華歷簡奴戰意點都好過馬體會，受讓玩得過。