曼聯「-1」出口氣

猪拉多纳

15/04/2012
文： 蘇豪

英超榜首球隊曼聯今輪喺主場撲擊阿士東維拉，「紅魔鬼」上場作客韋根爆冷跌三分，今場將以最強人腳同最嚴謹態度對付維拉，贏波非難事，特別係維拉前線兵微將寡，無力反抗，曼聯可望大勝，「讓球主客和」曼聯讓一球，捧「讓球主勝」！（有線300及200台周日晚11時直播）


曼聯上場被韋根「攞命博」打法逼死，連組織個攻勢都唔掂，確實渣咗啲。不過，「紅魔鬼」之前甩開次席曼城八分，輸一場波唔係世界末日，呢場敗仗有如當頭棒喝，令球員更小心應付餘下每場賽事，正面啲睇絕非壞事，最緊要係盡快重整旗鼓，喺下月初決戰曼城前繼續贏波保住領先優勢。


「紅魔鬼」今次重返奧脫福球場出擊，中場靈魂人物史高斯將復任正選，有番呢個老將喺中場分波，進攻可回復水準。另外，射手朗尼上場罕有地表現沉寂，仲提前被換走，但佢近四場主場聯賽都有士哥，仍然係數胡人物，仲有個倒戈出戰嘅快翼艾舒利楊格，曼聯前線人強馬壯，有條件大勝一場一洗悶氣。

維拉死火冇力還擊

阿士東維拉曾幾何時擁有銳利鋒線，隨住艾舒利楊格離隊，王牌前鋒戴倫賓特長抖，加上艾邦拉荷傷愈後未復佳態，依家前線人才凋零，小將安祖斯韋文極具潛質，但始終冇乜出過大場面，難當重任！維拉今季作客曼城、熱刺同阿仙奴等前列球隊都輸兩球或以上，今次相信亦唔例外。