巴塞圍剿疲兵利雲特

猪拉多纳

14/04/2012
文： 郭球奇

為從後趕上衞冕西甲冠軍，巴塞隆拿近日plan好晒所有計劃，今晚作客利雲特相信實食無黐牙，畢竟射手美斯啱啱畀比利話唔係世上最佳球員，為反擊隨時又爆發，誓要幫「地上最強」大勝開1.46倍「讓球客勝」！（now632台及廣東體育周日凌晨4：00直播）


巴塞近況弗爆，啱啱周中西甲主場大勝基達菲4：0後，聯賽已經10連勝，追到落後榜首皇馬僅4分。為迎接嚟緊嘅魔鬼賽程，英國《每日郵報》爆料，話巴塞踢埋今場後，下周一會提早飛去倫敦備戰歐聯4強首回合作客車路士，到下周四先返西班牙，目的係等班球員可以遠離傳媒，專心備戰下周末對皇馬嘅國家打吡，計劃得咁詳盡，無非都係想擸盡今季所有冠軍，試問今晚點會放過利雲特？

利雲特後衞平均35歲

據西班牙傳媒報道，巴塞為留力下周中對付車路士，今晚會收起拉傷肌肉嘅中堅碧基，以及啱啱34歲生日、盛傳獲球隊提供終生合約嘅佩奧爾，同沙維、恩尼斯達等主力，不過近況弗到漏嘅美斯會繼續擔正，佢近日竟畀巴西球王比利批評唔係目前世上最佳球員，仲話連尼馬都不如，一向低調嘅美斯想反擊，今晚開入球騷可謂最佳方法！


據西媒分析，利雲特今季有74%入波嚟自死球，覺得佢哋今晚有權喺每場平均犯16次規嘅巴塞身上入波，仲攞利雲特自上季升班後，主場未輸過畀巴塞同皇馬嘅數據出嚟講，但其實利雲特條防線平均年齡高達35歲，經歷啱啱嘅周中快車檔期，班老鬼點回得切氣，何況佢哋近6次對住巴塞輸咗5鋪，今晚想再創奇迹實在冇咁易！

利雲特近6次對巴塞輸5場

日期 戰果


11/12/04客負巴塞0：5

11/05/12主和巴塞1：1

11/01/03客負巴塞1：2

08/02/24客負巴塞1：5

07/09/29主負巴塞1：4

07/04/29客負巴塞0：1

橫數千軍

 利雲特首循環輸5粒

‧今季首循環作客巴塞輸0：5。

‧近8場4勝1和3負，僅2場無失波。

 巴塞西甲10連勝

‧聯賽10連勝，每場至少入2球。

‧近4次贏西甲冠軍，有2次喺作客利雲特後決定。