里昂上晒力 可捧法聯盃

猪拉多纳

14/04/2012
文： ComboKing

除咗各地聯賽轉入最後直路，本周末亦有多場盃賽決賽舉行，法國聯賽盃由兩支傳統勁旅里昂及馬賽角逐，里昂無論近況、往績、氣勢上皆勝對手，小讓平半上盤可捧。


（now 714周日凌晨3時直播）

馬賽近12仗不勝

今場比賽安排於中立場聖旦尼法國球場舉行，彼此冇主客之分，雙方今季聯賽已爭標無望，想過捧盃癮就要搏呢場。馬賽早前在法足盃被丙組仔奎維利淘汰，聯賽又落後第4位嘅里昂13分，如果想進軍來季歐洲賽，今次可以講係最後機會，可惜佢哋近況麻麻，自2月尾喺歐聯擊敗國際米蘭後，連盃賽在內近12場比賽只得2和10負，教練迪甘斯承認球隊正陷入前所未有嘅信心危機。


里昂自從喺歐聯被尼科西亞淘汰後，專注本土賽事發揮理想，早前於法足盃接連擊敗聖日耳門及GFCO阿些斯奧打入決賽，近5場聯賽亦取得4勝1和。翻查往績，里昂近8次對馬賽只曾1敗，其餘7戰錄得4勝3和，小讓平半值博率高。

賓菲加讓得起基維辛迪

同日另一場盃賽決賽係葡聯盃，賓菲加於中立場科英布拉球場鬥基維辛迪，賓菲加質素遠勝對手，上次聯賽碰頭輕取3比1，可取「讓球主勝」。至於蘇足盃4強戰鴨巴甸鬥喜伯年，鴨軍近4次對賽2勝2和未輸過，讓平半捧上盤。