黑貓主場大起病狼

猪拉多纳

14/04/2012
文： 張志德

季尾波真係好惡估，都唔知班中游分子，究竟抱乜心態落場，如果靠佢哋食胡就大鑊啦。你睇英超新特蘭，就知乜嘢叫表現飄忽，本身打和曼城、熱刺踢得好哋哋，但上場鬥半力愛華頓就吞四蛋，真係累人不淺！


今晚「黑貓」又出擊，英超主場對狼隊個Ｗ唔夠1.5倍，真係毫無投X價值，因為根本唔知佢哋想唔想要三分，與其係咁，就不如轉捧大盤。喂細鬼，「黑貓」連續兩場冇波入喎！大家要知道新特蘭攻力唔差，佢哋只係「不為」，而非「不能」，今場返到主場，點都希望入番夠本。

狼隊橫死掂死豁出去

早幾星期已經講過，狼隊季中炒麥卡菲係個不智決定，個老細簡直就係「趕狼入窮巷」，逼自己班波入死角，聯賽連輸七場後，已落後尾四韋根九分，本季僅餘五場賽事，可以講來季九成英冠見。現階段橫死掂死，攞一分都嘥氣，近期狼隊已豁出去，希望攞到救命三分。可惜呢隻病狼攻不銳、守不穩，近九戰每場最少失兩粒；近十二戰更有十一場開大。今戰守嚟亦無謂，續捧大盤。


（有線301及201台周六晚10時直播）