紅軍足總盃Encore

猪拉多纳

14/04/2012
文： 麥馬拿仁

利物浦老細連總監都炒埋，班衰仔球員又點會唔知驚？今晚英格蘭足總盃四強戰，利物浦於中立場溫布萊球場硬撼愛華頓，賽前約翰亨利怒炒科莫尼，明顯對本季戰績唔滿意，若失落足總盃，球隊上下都自身難保！「紅軍」立心搏盃賽必有更佳表現，少讓平半捧上盤！（now 671及672周六晚7時30分直播）


利物浦人腳唔曳，成績唔好來自心態問題。攞完聯賽盃後，見聯賽冇得博前四，班球員就放軟手腳，揀波踢情況非常嚴重。三月頭接連不敵阿仙奴同新特蘭後，對同市死敵愛華頓就生龍活虎贏三粒，跟手於足總盃八強對史篤城，亦全部死魚翻生贏波過關。「紅軍」依家好明顯只想博做「盃賽雙冠王」，對手仲係「拖肥糖」，大家唔使擔心「紅軍」會無恥hea踢。

地震完畢　唔搏唔得

約翰亨利入主紅軍以來，已掟咗超過一億鎊買人，但見班友表現唔係路，日前就躁爆怒炒總監科莫尼，高層湯韋拿之後話：「紅軍要繼續前進，依家就有場大波等緊我哋，到季尾一定要踢番啲好波！」老細果斷手起刀落，杜帥同班球員都知佢冇情講，今場贏唔到分分鐘季尾被清走，又點敢再掉以輕心？再講於「希爾斯堡慘劇」廿三周年前夕，「紅軍」必施渾身解數，以慰當年九十六名死難球迷在天之靈。


雖然連拿坐波監，杜尼上訴被駁回亦要停賽，要用三號門將巴利鍾斯，但後防新領袖丹尼爾艾格已經復出，而謝拉特、蘇亞雷斯、達寧、荷西安歷基等都抖夠，今場鬥老對手會有理想發揮。

愛華頓打吡戰冇甜頭

愛華頓近況係勇，近五戰四勝一和，但近年對「紅軍」都冇甜頭，近六對戰輸咗四場，本季聯賽就被雙殺，仲要一粒都入唔到。發火「紅軍」回復專注，讓得起平半。

近5次足總盃交手成績

04/02/09 第4圈重賽 愛 1：0 利（加時）

25/01/09 第4圈 利 1：1 愛

27/02/91 16強重賽 愛 1：0 利

20/02/91 16強重賽 愛 4：4 利

17/02/91 16強 利 0：0 愛

註：前者主場