馬拉加見真章平手抵玩

猪拉多纳

12/04/2012

復活節快車檔期今晚進入最後一日，焦點有西甲維拉利爾主場對馬拉加。馬拉加近排愈戰愈勇，辛迪卡索拉同伊斯高一對中場更加踢到曉飛，相反「黃色潛艇」換帥後仍毫無起色，今場仲受傷停困擾防線天殘地缺，難怪羅斯仔都暗示季尾要走人。足智彩今場開平手盤，朱楓睇好馬拉加坐走望贏！（廣東體育周五凌晨2：00直播）


今季大事擴軍後一直被評名大於實嘅馬拉加，近排終於打出符合番身價嘅表現，上場主場大勝桑坦德3：0後，唔經唔覺已經殺上第3，下季大有機會直接殺入歐聯分組賽。今晚作客維拉利爾，西班牙傳媒賽前都將焦點放喺倒戈嘅馬拉加中場辛迪卡索拉身上，呢位鬥牛國腳揚言今場入波都唔會慶祝，莫非預感自己今場有料到？而且另一中場伊斯高近況亦非常sharp醒；即使防守中場迪米捷利斯累積足夠黃牌要停賽，好在馬拉加仲有伊拿斯奧甘馬曹呢名防中可以用，影響唔算太大。

羅斯仔放風季尾「跳船」

對家維拉利爾今季立立亂，早前作客不敵利雲特後今季第2度換帥，改由洛迪拿執教，本來個局都開得幾靚，首戰就主場逼和皇馬，可惜之後卻無以為繼，上場作客貝迪斯仲踢到唔知似乜，最後輸1：3之餘，更有右閘馬里奧加斯柏傷出，左閘祖安奧利奧又攞咗今季第5面黃牌，今晚要同該場被逐嘅右中場安祖盧比斯齊齊坐波監，後防面臨大變陣。


可能睇見班波今季護級勢危，據報就快傷愈復出嘅前鋒基奧斯比羅斯，賽前竟向意大利傳媒暗示今季尾極大機會離隊，都咪話唔影響潛艇嘅士氣，今晚想搶分護級實在唔易，平手盤梗係博馬拉加着數得多啦！