撐法林明高威番次

猪拉多纳

12/04/2012
文： Mic少

南美自由盃分組賽打到尾聲，投X前最重要睇清楚出線形勢，好似B組最後一輪，巴西法林明高主場對阿根廷拉魯斯，主隊今仗必須贏波先至有望出線，好彩拉魯斯已穩奪出線權，戰意應會稍遜，加上法林明高上輪輸波後遭球迷狠批，無論為分數或為面子，都不容再失，主勝穩陣。（周五早上6時30分開賽）

力圖挽回Fans信心

法林明高擁有朗拿甸奴同路夫等高質素球員，但搞到依家排喺小組包尾，實在羞家，尤其係上輪作客厄瓜多爾嘅艾美歷克，領先之下竟反輸收場，激嬲擁躉，更有球迷專登去機場，準備向佢哋掟雞蛋，結果全隊要行「後門」避禍，認真樣衰。法林明高經過慘痛教訓後，今場應會打醒十二分精神，否則一旦贏唔到，隨時行唔出球場，爭勝意欲毋庸置疑。


法軍另一個有利因素係拉魯斯已肯定可以晉級，冇必要同佢哋硬碰。由於拉魯斯今季喺阿甲成績不濟，同樣備受壓力，相信佢哋會暫時將重心放番喺聯賽，令法林明高有機可乘。

E組兩場都揀客W

另外，E組兩場最後一輪賽事，秘魯球隊利馬聯主場對巴拉圭球隊利伯泰迪，烏拉圭球隊蒙特維多國民隊主場對巴西球隊華斯高。兩支主隊都已篤定出局，而兩支客軍已穩奪16強席位，但佢哋要爭首名出線席位，預料都會出真功夫求勝，兩場都捧客W。