基達菲主場超勁 希杭等死冇得剩

猪拉多纳

07/04/2012
文： 鄭少聰

平日得閒無事，「亨利」都鍾意煮番兩味，前排行開街市一心想整海鮮餐，點知見到啲價錢眼都凸埋，啲蝦毛都要成百幾銀一斤！老闆就同「亨利」講休漁期海鮮係貴o架喇，嫌貴就忍吓口過咗休漁期先食喇。家陣終於等到海鮮價回落，「亨利」仲唔盡情食番夠本咩！食海鮮食得過癮，就連今晚場西甲隊「海鮮波」基達菲都唔放過，博佢主場對住包尾大幡希杭贏得，力撐2.55倍「讓球主勝」！（開賽時間：周日凌晨0：00）


話基達菲係海鮮波真係冇講錯，季初佢哋仲喺榜尾為護級苦苦掙扎，點知到咗下半季又彈番上嚟，玩吓手仲有機玩埋下屆歐洲賽添，認真估佢哋唔到。

地頭龍連o趙巴塞 華倫

呢隊波最得人驚係喺主場神起上嚟，連「地上最強」巴塞隆拿同埋「三哥」華倫西亞都要擺低晒3分，就算迎戰皇家馬德里都只係小輸0：1，淨係呢啲主場戰績都引死「亨利」啦！近期基達菲一班射手，好似「土炮」迪亞高卡斯度，同委內端拉前鋒米古咁都交足功課，今晚唔知有冇波入呢？


今場作客嗰隊希杭，近7場輸咗5場搞到跌番落榜尾，班波近期演出真係好唔掂，班球員睇嚟有啲都打定輸數下季西乙見，呢場波作客應該阻唔到基達菲開「讓球主勝」啦！