AC 3.5倍「讓和」高回報

猪拉多纳

07/04/2012
文： 郭球奇

喺歐聯出局，對AC米蘭嚟講其實唔壞得晒，至少可以專心番意甲爭標，今晚喺主場對費倫天拿，「紅黑兵團」賽前仲收到長期傷兵卡斯辛奴可能復出嘅消息刺激，朱楓睇好佢哋今晚可以順延對賽優勢，小勝鬧前鋒荒兼內部立立亂嘅「紫百合」，捧3.5倍「讓球和」！（now633及660台周六晚9：00直播）

卡斯辛奴復出振奮士氣

意甲「一哥」AC米蘭日前喺歐聯8強作客不敵巴塞隆拿出局，賽後前鋒柏圖仲宣布因傷提早收咧，不過「紅黑兵團」喺今晚對費倫天拿前夕，就收到早前心臟有事嘅卡斯辛奴已復操跟青年軍踢熱身賽，呢個揚言之前諗過自己會死嘅「壞孩子」，賽後仲透露今晚有可能復出，一班隊友聽到都咪話唔興奮。


由於歐聯同意盃都已出局，AC今季就只得番意甲有機會爭冠軍，朱楓相信教練阿里基嚟緊一定會打醒十二分精神。事實上，近日有意國傳媒傳出AC若錯失今季意甲冠軍，阿里基將被炒，今晚帶隊主場出擊，贏波可謂平息傳言嘅最佳方法。

紅黑兵團對賽例贏1粒

對家費倫天拿近日喺聯賽5場不勝後，唔經唔覺已跌落17位，距離護級安全線僅相差5分。由於今季成績太差，球會宣布咗唔會同體育經理哥雲奴續約，點知前費倫名將雷哥斯達亦透露唔會接手。當然，同時間亦傳會炒教練迪里奧羅斯，但米赫洛域同史巴列堤又都話唔會接呢個燙手山芋，可想而知費倫目前處境有幾曳。


今晚作客AC，據講因為前鋒阿利斯奧施斯同中場蒙杜利禾停賽，箭頭阿馬利又有傷，中場拿沙利好可能要客串單箭頭，再睇埋費倫近8次對住AC輸足7次，有6次僅負1球，若嫌主W得1.24倍冇肉食，真係不妨信往績冷吼多少「讓球和」。

費倫近8次對AC慣輸1球

日期 戰果

11/11/20 主和AC米蘭0：0

11/04/11 主負AC米蘭1：2

10/11/21 客負AC米蘭0：1

10/05/02 客負AC米蘭0：1

日期 戰果

10/02/25 主負AC米蘭1：2

09/05/31 主負AC米蘭0：2

09/01/17 客負AC米蘭0：1

08/02/03 主負AC米蘭0：1

橫數千軍

紅黑兵團幾乎場場有波入

‧近9場聯賽不敗，獲6勝3和，對上8場均有波入。

‧伊巴謙莫域暫以22球排射手榜首位。

紫百合作客意甲第2差

‧近9場聯賽得1勝2和6負，當中有5場食白果。

‧聯賽作客1勝6和8負，勝率僅7%，全意甲第2差。