多蒙特馭狼有術

猪拉多纳

07/04/2012
文： 蘇斯黑柴

德甲爭霸入直路，榜首雙雄多蒙特同拜仁將於下周四凌晨正面對決，目前多蒙特領先優勢已縮減至3分，對拜仁大戰前絕對不容有失，球隊今晚傷疲盡起，作客有力擊敗近年畀佢哋食住嘅「狼堡」禾夫斯堡，黑柴撐客Ｗ。（有線64台周六晚9時30分直播）


多蒙特上輪喺經典入球大戰中遭史特加逼和4：4痛失兩分，經過一周休整，球隊接連收到好消息，中場硬漢施雲賓達復任正選，「金童」馬里奧葛斯亦傷愈候命，教練高普決定調整陣容，收起連仗令人失望嘅本土中場哥斯基奧斯，重用質素同狀態都更出色嘅克羅地亞戰將比列錫，黑柴相信呢個變動會帶嚟正面效果。

連續3次輕取禾夫斯堡

多蒙特少帥高普向來對禾夫斯堡都有辦法，早喺05-06年執教緬恩斯時，已經喺聯賽兩循環雙殺禾堡，共入8球只失1球，而帶領多蒙特至今7次遇「狼堡」，亦只曾喺09年輸過一次，但當年奪冠嘅禾堡擁有迪斯高同加菲迪雙煞，近年禾堡實力下滑，多蒙特近3次對賽都輕鬆取勝，合共轟入10球只失1球，往績佔盡上風。


禾夫斯堡近期4連勝士氣正盛，不過要留意佢哋所遇嘅唔係弱旅就係態沉對手，演出水準唔高，上仗該隊雖然大勝排尾二嘅哈化柏林4：1，但防線混亂不堪，若非對手鋒將連番錯失必入良機，禾堡贏唔贏到都成問題，今晚遇上志在衞冕嘅多蒙特，禾堡攻守實力都次一皮，主場出擊都睇低一線。