洛蘭迪復出畢爾包再「克」敵

猪拉多纳

05/04/2012
文： 朱楓

連下屆歐聯資格都唔要，畢爾包對今屆歐霸盃可謂志在必得！今晚呢支西班牙雄師會喺8強次回合主場對德甲嘅史浩克04，預計喺射手洛蘭迪復出擔正下有權再贏多鋪，1.7倍主W放心捧！（有線61及201周五凌晨3：05直播）


首回合畢爾包作客史浩克反勝4：2，今晚返番主場唔輸都可以出線，情況同上圈對曼聯好相似，但畢爾包最後咪再贏「紅魔」出線。其實畢爾包早前喺西甲好有機會殺入前4爭下屆歐聯資格，點知自從贏完曼聯後，成班波明顯放棄西甲專心攻歐霸盃，好似上輪西甲作客巴塞隆拿咁，竟然將射手洛蘭迪、蒙尼恩、中場安達靴里拉同中堅阿武列比達4大主將先放後備席，難得射手洛蘭迪喺今仗賽前仲警告球隊今晚咪輕敵，似乎畢爾包好想將歐洲賽主場已7場不敗嘅紀錄延續，中場伊度拉斯比停賽問題根本唔大。

史浩克門將希迪布蘭倦勤

史浩克首回合主場輸波，朱楓覺得全因佢哋喺尾段攻得太上，今晚喺焗攻下，隨時重複犯錯，畢竟史浩克上回合有門將希迪布蘭因手肘受傷傷出，今仗極大機會要起用啱啱先傷愈嘅第三門將烏拿史杜爾把關，再睇埋佢哋今屆歐霸盃自踏入淘汰賽後作客未嘗1勝、史上作客西球會亦只得2勝4和5負劣績，睇怕魯爾同亨特拉爾就算識飛亦難避再敗厄運。


首回合：畢客勝4：2


賽制：採主客兩回合淘汰制，今輪為8強次回合，若總比數相同，作客入球較多一隊晉級，再和則於次回合後加時作賽。若加時入球數字相同，客隊將憑作客入球優惠晉級，若加時沒有入球，則需互射12碼決勝。