3大主力復出 蝙蝠兵團狂噬AZ

猪拉多纳

05/04/2012
文： 亨格比利

正所謂物極必反，華倫西亞衰咗咁耐，睇怕都係時候反彈！歐霸盃8強首回合輸1：2嘅「蝙蝠兵團」，為晉級今晚非勝不可，適逢一眾戰將包括首席射手蘇爾達杜悉數復出，鬥心同戰鬥力俱備，有權砌低阿爾克馬爾（AZ）扭轉敗局，一於捧2.08倍「讓主」。（有線64及204周五凌晨3：05直播）

開粒半鐘會傾戰術

華倫西亞呢排戰績差到震，最近4戰只得1和3負劣績，但今晚歐霸盃竟畀莊家睇好，主勝熱到得1.39倍，似乎有計喎！查實華倫上場聯賽失分畀利雲特，好大程度因為蘇爾達杜、佐迪艾巴同般奴沙托停賽，3位前中後猛將今鋪齊齊復出，預期「蝙蝠兵團」表現會脫胎換骨。


佢哋喺歐霸盃8強首回合造訪AZ失威，但咪忘記AZ今季25場主場賽事都未輸過，「蝙蝠兵團」僅輸1：2算係有交代。況且華倫教頭艾美利今季有兩大目標，除咗保住聯賽第3之外，就係要捧走歐霸盃，賽前艾美利隆重其事，特別召開咗個為時粒半鐘嘅戰術會議同班手足傾打法，嚴陣以待，睇嚟AZ都難逃劫數。


首回合：華客負1：2