鯨魚傷疲盡起殺聲震「天」

猪拉多纳

03/04/2012
文： 走肖

今晚亞冠盃分組賽又有中日大戰上演，FC天津今晚喺G組主場對名古屋鯨魚，唔似惡得出樣。天津日前喺中超作客以1：3慘負北京，引發網民瘋狂喪插，門將宋振瑜意興闌珊兼壓力爆煲，竟然話要鬆人，鯨魚1.95倍客W抵捧！（now671台、廣東體育及中央5台周二晚7：30直播）


天津今仗有前鋒范志強及中場胡人天因傷肯定缺陣，不過傷兵問題並唔係最致命，反而佢哋喺中超輸畀傳統宿敵北京後，粉絲喺網上喪鬧更令人擔心。雖然天津主力包括陳濤、周燎同曹陽即刻喺微博作出道歉，但球迷唔領情鬧得更勁，矛頭更直指孭鑊嘅門將宋振瑜。

天津門將宋振瑜冇癮嗌走

由於自尊心受損，跟手宋振瑜喺微博話只要到轉會期，就會主動要求離隊，讓出正選位置畀更適當嘅球員。呢番說話，宋振瑜冷靜後補鑊解釋係一時意氣，但明眼人都睇得出，上年歷史性捧走中國足協盃嘅天津陷入嚴重信心危機，否則宋振瑜點會想跳船！


反觀對手名古屋鯨魚嘅傷兵問題已接近解決晒，季初傳出有傷嘅前鋒玉田圭司、中場藤本淳吾同小川佳純都已經好番，當中玉田圭司同藤本淳吾喺日前作客以1：1打和大宮松鼠嘅聯賽，更加打正選，主力得番中場中村直志需要養傷，現時G組4隊全部得2分，鯨魚要爭出線，今仗係搶分良機。

亞冠盃及自由盃賽制：32隊分8組進行雙循環分組賽，每組首、次名躋身16強。