歐霸榨乾漢諾威金身難保

猪拉多纳

01/04/2012
文： 蘇斯黑柴

周日兩場德甲賽事，正在歐霸盃半準決賽奮戰中嘅漢諾威同史浩克啱啱搏完首回合未回氣，又要分心嚟周中次回合 ，好難集中精神應付今晚聯賽，黑柴建議捧晒佢哋對家。


頭場漢諾威主場對慕遜加柏（有線61及64台周日晚9時30分直播），漢諾威今季喺各項賽事仍保持主場不敗金身，實在難能可貴，不過長期兩線作戰，以該隊有限兵力實在無力分心。

平手盤撐慕遜加柏

自2月17日起計，漢諾威近半個月已經踢咗11場硬仗，球隊成績亦明顯受到拖累，近8場正式賽事只得2勝2和4負成績，遠遜較早前，包括主場賽和弱旅奧格斯堡，如今歐霸盃去到半準決賽重要關頭，佢哋三日前作客西班牙硬撼馬體會，踢到尾段慘遭絕殺，體能士氣都受損，不過由於首回合作客只輸1：2，攞到一個作客入球，嚟緊周中次回合主場仍有厚望收復失地，球會歷史上首次殺入歐霸四強至關重要，今晚好難集中精神踢聯賽。


慕遜加柏上仗輸完蓄銳出擊，目前仍有爭第三搶下屆歐聯直接參賽資格任務，加上質高一皮兼傷疲盡起，力足打破漢諾威主場不敗身，平手盤宜捧客軍。

史浩克難贏賀芬咸

至於尾場賀芬咸主場對史浩克（有線61及201台周日晚11時30分直播）情況大同小異，史浩克三日前主場鬥畢爾包喺領先2:1情況下倒輸2:4，即使老大哥魯爾踢盡身價波，但防線不濟搞到前面入埋唔夠後面輸，搏完該役力疲心傷，雖然出線機會渺茫，但去到八強階段唔會就此扯白旗，依然憧憬周中作客西班牙創奇迹，今晚聯賽疲兵出師好難贏，賀芬咸上輪聯賽反勝慕遜加柏士氣正盛，主場受讓平半值得捧場。