阿仙奴客W冇昆你

猪拉多纳

31/03/2012
文： 蘇豪

英超尾三球隊「QPR」昆士柏流浪主場對「三哥」阿仙奴，兩隊各有所求，大家都要爭分，「兵工廠」連贏6場，現時處於全季最佳狀態，王牌前鋒尹佩斯近兩場都冇士哥，球隊仍然能贏波，足見班波已經返晒嚟，7連勝可期，捧客勝！（有線204及304台周六晚10時直播）

食住個勢保前4

阿仙奴今季大起大跌，踢到二月尾於打吡戰狂數死敵熱刺，一戰打番起信心，之後5戰全部贏晒，包括作客擊敗默西賽德郡雙雄利物浦同愛華頓，歐聯主場炒AC米蘭3蛋，呢期士氣信心爆晒燈。「兵工廠」依家喺聯賽超越熱刺重上第3，現時領先3分，同時拋離第5位車路士8分，前4位置相當穩陣，不過佢哋梗係要食住個勢爭取連勝，進一步鞏固當前有利形勢。


昆士柏流浪護級形勢危急，目前落後尾四保頓1分仲多賽1場，近期一眾護級對手頻頻搶分，再唔爭氣恐怕難保頂級聯賽席位。昆士柏流浪前仗主場落後兩球情況下反勝利物浦盡顯鬥心，但要多得「紅軍」失準先可完成大逆轉，阿仙奴表現咁平穩，唔會好似利物浦咁客氣。箭頭施斯上仗領紅，今場要停賽，中鋒森莫亞狀態平平，前線火力偏弱。

QPR防線唔掂

阿仙奴今季靠尹佩斯食胡，呢位星級前鋒近兩場聯賽冇士哥，球隊都能全取3分，全靠其他隊友幫到手，昆士柏流浪近3戰失7球，防守力明顯唔掂，難阻弗爆嘅「兵工廠」贏波，客勝好路。