|
|
31/03/2012
文： 蘇豪
英超富豪球會曼城今輪回師無敵主場撲擊新特蘭，曼城跨季聯賽主場廿連勝，淨計今季十五戰全勝，除三鬥前五位球隊小勝一粒，其餘十二戰都淨勝兩球或以上，惡氣十足！「黑貓」向來被視為「曼聯Ｂ隊」（曼Ｂ），但實在無力做攔路虎，熱捧曼城「讓球主勝」！（有線300及200台周六晚10時直播）
曼城跨季連續廿場主場聯賽贏晒，已經打破英超紀錄，佢哋勁在入波多、失波少，單計今季聯賽主場十五戰轟入四十四球，平均每場射入接近三球，而僅失七球，大約踢兩場先失一粒，攻守數據都咁掂。
主場15連勝遇弱例炒
曼城今季聯賽主場鑊氣甚勁，除面對前五球隊阿仙奴、熱刺及車路士小勝一球外，其餘賽事最少都淨贏兩粒，開出「讓球主勝」比率高達八成，確實非常誇張！
曼城接連於客場失分，現時落後榜首「紅魔」曼聯三分，難免令人擔心球隊狀態回落，但呢班波主、客場踢落完全係兩回事，無論作客打得幾曳，返到主場都會自動波踢出水準。曼城射手阿古路有傷上陣成疑，但佢位阿根廷同鄉泰維斯喺預備組操到着晒火，可望擔正攻堅，加埋巴洛迪利及大衞施華等星級進攻球員，後防仲有隊長高柏尼傷愈候命，再無後顧之憂。
新特蘭夠皮往績輸晒
新特蘭擁有多位曼聯舊將，佢哋面對死敵分外有鬥心，希望為舊會打江山。不過，曼Ｂ重心成員布朗、奧沙同基蘭李察臣同樣有傷在身，得番守將巴士利同箭頭費沙甘保等邊緣球員在陣，幫唔到幾多。
另外，「黑貓」由曼城借用左閘布歷治，佢因借用條例無緣倒戈，側擊力再減。大軍近六次作客曼城輸晒，包括上季淨吞五蛋，加上剛於足總盃出局，聯賽亦冇護級壓力，隨時有機會再次被大炒！
曼城主場剋死新特蘭
球季 戰果
10/11 勝5:0
09/10 勝4:3
08/09 勝1:0
07/08 勝1:0
05/06 勝2:1
|
|
金睛卡
发表于 2012-3-31 08:24
变色卡
显身卡