|
|
30/03/2012
澳職（A-League）季後賽今日勁爆開打，常規賽冠軍中岸水手同亞軍布里斯班獅吼，分別要打破宿命同創造歷史。中岸過去3次殺入季後賽總決賽，始終鎩羽而回；獅吼就要爭取冧莊，成為史上首支成功衞冕總冠軍球隊。唔好忘記珀斯光輝、威靈頓鳳凰、FC悉尼同墨爾本雄心同樣爭住攞「A」，戰況肯定夠激。
中岸水手（常規賽排名1）
曾於06年、08年同11年先後躋身季後賽總決賽飲恨嘅中岸水手，今季能夠喺常規賽封王，最主要係防線夠硬淨，聯賽踢得27場只係失24球，防線密到幾乎針都插唔入，成為澳職防守力最強球隊。
現年19歲嘅中岸門神馬菲賴恩，前季已經上位當選澳職最佳年輕球員，現時佢係澳洲奧運隊主力，並且被視為國家隊未來希望，把關功夫受到各方激讚。雖然馬菲賴恩今季曾經因傷休息，被迫錯過唔少比賽，不過中岸今季平均每場聯賽只係失0.89球，佢依然有好大功勞，破唔破到宿命捧盃要睇佢發揮。
防守王排名
1.中岸水手（失24球）
2.布里斯班獅吼（失28球）
3.威靈頓鳳凰（失32球）
布里斯班獅吼（常規賽排名2）
上季成為常規賽同總決賽雙料冠軍嘅布里斯班獅吼，今季保持強大火力，聯賽27戰入50球，有能力攻陷任何澳職對手大門。入球數目比常規賽冠軍中岸水手多出10球，單計入球能力絕對係澳職最強。
今季獅吼火力咁勁，最主要係阿爾巴尼亞國腳貝利沙大爆發，攻入18球成為常規賽神射手。以往貝利沙効力漢堡同比勒費爾德出場機會有限，根本冇咩人留意到佢，但去到澳職就完全係佢世界，瘋狂入波下造就獅吼平均每場聯賽攻入1.85球，只要佢繼續有波入，就有機會帶挈獅吼捧盃歷史性冧莊。
入球王排名
1.布里斯班獅吼（50球）
2.中岸水手（40球）
3.珀斯光輝（40球）
珀斯光輝（常規賽排名3）
珀斯光輝向來作客無力，但經過今季瘋狂擴軍後，作客表現明顯有好轉，至少唔會再任由魚肉，最終常規賽作客有5勝3和6負，演出有晒交代，加上主場表現對辦有8勝1和4負，所以無論讓波定受讓都好容易有斬獲，結果今季聯賽27戰有14次開出「讓球勝」收錢，比率達到52%，追捧價值相當高。至於「讓球和」同「讓球負」，就分別有6場同7場。
讓球主客和勝出排名
1.珀斯光輝（14場/52%）
2.墨爾本雄心（14場/52%）
3.威靈頓鳳凰（13場/48%）
威靈頓鳳凰（常規賽排名4）
威靈頓鳳凰入球能力可以話係有限公司，今季常規賽27戰入34球，屬於季後賽6強中火力最差球隊。正因為咁，鳳凰今季常規賽得10場開入球大，反而有17場開入球細，唔傾向同對手搶攻或者開入球騷，開入球細比率高達63%，佢哋唔會要求盡數對手，而且唔介意歎慢板鬥耐性，踢守勢波至係佢哋最強項，所以吼實鳳凰入球細始終有着數。
開細王排名
1.威靈頓鳳凰（17場/63%）
2.中岸水手（16場/59%）
3.阿德萊德聯（15場/56%）
FC悉尼（常規賽排名5）
FC悉尼喺今季常規賽表現唔出冠軍相，聯賽27場入37球前線火力普通，但由於佢哋防線唔穩陣，失球數字達到42球，所以好容易同對手開入球騷。今季悉尼喺常規賽有16次開入球大，相反開入球細得11場，最終與入唔到季後賽嘅墨爾本勝利，成為常規賽開入球大次數最多球隊，比率達到59%，覺得玩入球大比較刺激簡單嘅球迷，一定要緊貼悉尼嘅比賽至得。
開大王排名
1.FC悉尼（16場/59%）
2.墨爾本勝利（16場/59%）
3.珀斯光輝（15場/56%）
墨爾本雄心（常規賽排名6）
墨爾本雄心今季以2分之微壓倒紐卡素噴射機，搭上尾班車躋身季後賽，過程令球迷嚇到冷汗都出埋。但如果單計投X角度，雄心擁躉就應該笑晒口，今季佢哋喺聯賽有17次足智彩開「讓球」，結果佢哋有9次成功收錢，另外有3次走盤，淨係話得5次損手而回。由於雄心「讓球」有9次成功收錢，比率達到53%，兼且有71%機會唔使輸，比起中岸水手得60%唔使輸更抵捧。
讓球勝出排名
1.墨爾本雄心（9場）
2.紐卡素噴射機（9場）
3.中岸水手（9場） |
|
金睛卡
发表于 2012-3-30 11:06
变色卡
显身卡