達拉斯走晒樣 華盛頓乘機搶Ｗ

猪拉多纳

30/03/2012
文： 艾森曼嘉

美職獨腳戲由華盛頓聯隊主場對FC達拉斯，經過三輪聯賽之後，華盛頓聯賽仍未打開勝利之門，演出的確令人失望。但今次重返主場比賽，值得大家再畀次機會。對手FC達拉斯近期表現回落，作客賽事亦欠把握，主W可留意。（周六早上7時30分開賽）

回師主場有把握

華盛頓聯隊頭三輪賽事交唔到好成績，或多或少與對手實力太強有關，當中包括三戰全捷球隊肯薩斯體育會及上季總冠軍洛杉磯銀河。而上輪聯賽更要長途跋涉去到加拿大挑戰溫哥華白帽，精神及體力不足，再失分都可以理解。如今華盛頓聯隊終於重返主場，而且對手FC達拉斯實力又唔算太強，相信呢支首都球隊會好好把握有利形勢，爭取聯賽首場勝利。


FC達拉斯自開鑼日擊敗紐約紅牛之後，最近兩場都未能獲勝。FC達拉斯氣勢向下滑，今場當然唔睇好，主W超過兩倍相當吸引。