富明尼斯爭出線「薩」無赦

猪拉多纳

29/03/2012
文： 安高

南美自由盃聽朝有場D組大戰，之前3戰全勝嘅巴甲勁旅富明尼斯，將會出訪委內瑞拉嘅FC薩莫拿，客隊今仗贏波即可提早出線，為免夜長夢多，必搏無疑。考慮到佢哋實力亦遠勝主隊，安高力撐1.52倍客勝。（開賽時間：周五早上9：00）

FC薩莫拿唔夠班

富明尼斯近期戰事頻密，嚟緊州聯仲有場對保地花高嘅打吡戰要打，不過主帥艾比布拉加已經話明，今仗亦同樣重要，絕對唔會留手。安高賽前收到風，佢哋個進攻主力堤亞高尼夫斯已經及時傷愈，將夥拍費特攻堅，左閘卡連奴斯亦會復任正選，強陣出擊，有殺冇賠。


FC薩莫拿雖有主場之利，但呢支委內瑞拉球隊嚟到踢自由盃明顯係未夠班，踢完前3輪先得1分。家陣佢哋出線機會唔大，鬥志未必太高，加上實力所限，想搏都有心無力，今場輸少當贏啦！


賽制


32支球隊分8組進行雙循環分組賽，每組首、次名躋身16強淘汰賽。