拜仁狂鋒斬瓜切「賽」

猪拉多纳

28/03/2012
文： 朱楓

正所謂寧買當頭起！法國代表馬賽喺今晚歐聯8強首回合，主場對住德國勁旅拜仁慕尼黑，朱楓捧硬1.65倍客W，事關拜仁進攻鐵三角近排踢到曉飛，相反馬賽就狀態超曳，今戰陣容更天殘地缺，隨時連破蛋都冇機會！（有線62及202周四凌晨2:45直播）

馬賽防線兩大主力坐波監

法國勁旅馬賽自93年後再次殺入歐聯8強，但老實講，整體表現真係一般，喺分組賽主場3戰得1勝2負，去到16強對住同病相憐嘅國米，亦只係僅憑作客入球優惠晉級，表現完全冇說服力。


由於太過專注歐聯，馬賽近排狀態急跌，對上8場只得2和6負，歐聯晉級8強嘅代價亦都好大，中堅蘇利文尼迪亞華拉同門將文丹達今場都要停賽，前者仲黑到整傷右膝韌帶，好大機會連次回合都唔使預佢，加埋聯賽首席射手雷米又因傷缺陣，試問馬賽仲有咩本錢反彈？

近5戰入22球 「小豬」或復出

反觀對家拜仁慕尼黑近期狀態就好似火箭咁飆升，對上5戰獲4勝1和，合共射入22球，雖然今場續有中堅雲拜頓唔出得，但中場舒韋恩史迪加前日就過咗第一次體測，可能落得場，而且進攻鐵三角洛賓、列貝利同馬里奧高美斯都可以繼續披甲，當中「超級馬里奧」日前對漢諾威只係後備落場打咗半個鐘，養精蓄銳後隨時又爆發，畢竟佢喺今屆歐聯腳風超順，暫以10球排射手榜第2位，僅次於12球嘅美斯咋。


唔好唔記得今屆歐聯決賽會喺拜仁主場安聯球場上演，拜仁當然想返到慕尼黑自己地頭捧盃，為免夜長夢多，就算首回合作客相信都會以贏波為目標！

橫數千軍

馬賽近8戰不勝

‧近8戰不勝，6場開細。

‧史上5次主場對德國球會獲4勝1負。

拜仁防線夠硬淨

‧近4場比賽僅失1球。

‧史上4次於兩回合制淘汰賽遇法國兵，有3次出線。