巴塞教育 最強出最強 巴塞保證攞A

猪拉多纳

28/03/2012
文： 巨高

歐聯八強首回合上演最強戲碼，AC米蘭主場對巴塞隆拿！兩軍繼分組賽後再度相遇，巴塞分組賽曾作客三比二擊敗AC，明顯已見高下，今番再遇，巨高相信「地上最強」嘅巴塞只要做足「攻課」，必然可以再次攞「A」，捧客W。（有線61及201台周四凌晨2時45分直播）


先講ＡＣ軍情，幾位巴西主力都因傷缺陣，當中包括中堅堤亞高施華、前鋒羅賓奴及柏圖，另外荷蘭中場雲邦美停賽。ＡＣ傷病情況頗嚴重，今場焗用後備守衞邦利拿及前鋒麥斯盧比斯頂住先，影響隨時好大，事關邦利拿出名係「計時炸彈」，無輪打右閘或中堅都畀唔到球迷信心，對住巴塞班一級前鋒隨時被玩謝。

ＡＣ兵疲盞輸多鋪

另一方面，ＡＣ於上周中喺意大利盃四強與祖雲達斯鍊足百二分鐘後出局，剛過去周日意甲又險勝羅馬，兩場硬仗令ＡＣ球員體力大幅下滑，今場對巴塞會好蝕底，事關巴塞進攻水銀瀉地，ＡＣ將採壓迫性防守，體能需求極大，疲兵出擊下未必可以頂得住，只要一次甩漏，巴塞就有機可乘。


巴塞分組賽兩鬥ＡＣ取得一勝一和，而近兩次作客聖西路球場都能擊敗「紅黑兵團」，良好賽績肯定能增強巴塞球員信心。另外，美斯今季已取得十二個歐聯入球，如果再取得入球的話，將打破單季歐聯入球紀錄，巨高相信弗爆嘅美斯可於聖西路球場揚威，協助巴塞於首回合先拔頭籌。