新特蘭人見人「愛」

猪拉多纳

27/03/2012
文： 走肖

新特蘭今晚喺足總盃8強重賽主場對愛華頓，「黑貓」領隊奧尼爾係正宗盃賽專家，執教生涯拎過8次盃賽錦標，相反「拖肥糖」借用嘅派拿唔符合資格上陣，咁嘅情況，當然係捧新特蘭2.3倍主W。（now670台周三凌晨3:00直播）


奧尼爾係我心目中頂級嘅教頭，佢執教生涯初期為韋甘比2次奪得低組別盃賽冠軍，跟住幫李斯特城贏過2次聯賽盃，帶領些路迪就有4次盃賽錦標，最令人難忘嘅就係03年歐協盃決賽，佢帶領些路迪力戰至加時，最終以2:3不敵波圖，當年佢同莫連奴高手過招，牌面輸蝕都僅輸1球，點到你唔服？


對家愛華頓教頭莫耶斯亦得到高度評價，可惜吖，莫耶斯對盃賽冇咩心得，教波咁耐，最叻不過係09年帶領愛華頓入到足總盃決賽，而且佢哋借用嘅翼鋒派拿唔踢得，根本冇晉級把握。既然上次碰頭愛華頓主場只能夠同新特蘭踢成1:1，呢鋪作客睇怕凍過水。

足智彩盃賽晉級賠率

（二）15 新特蘭 Vs 愛華頓 主隊1.70 客隊2.02