為梅姆巴而戰! 保頓齊心起刺

猪拉多纳

27/03/2012
文： 朱楓

前排喺球場暈倒嘅梅姆巴終於脫離危險期，朱楓聽到都好開心，而佢保頓嘅隊友，梗係加倍興奮啦！梅姆巴事件令保頓更團結，今晚喺英格蘭足總盃8強再作客熱刺，朱楓深信佢哋會為梅姆巴而戰，一於敲4倍「讓球客勝」！（now671台周三凌晨2:30直播）

梅姆巴情況續好轉 識睇電視

呢場英總8強戰，本來9日前喺白鹿徑球場舉行，但完半場前因保頓中場梅姆巴突然暈倒而腰斬。朱楓嗰晚同成班行家去睇波，莫講話我哋睇到呆咗，兩軍球員更忍唔住失聲痛哭，部分保頓球員，更喺賽後話唔想再踢波……好彩，隨住梅姆巴近日康復進度良好，尋日最新消息，仲話佢開始食番嘢，間中仲可以短時間坐起身睇電視，令保頓成個陣營充滿正能量，日前又喺護級大戰擊敗布力般，狀態明顯復甦。


主力守將添列姆，賽後受訪嗰陣透露因為梅姆巴事件，令保頓變得好團結，佢又話見到全球球迷無分彼此，不斷為保頓及梅姆巴打氣，所以成班球員都好想做番啲嘢，希望殺入溫布萊氹梅姆巴及Fans。撞啱今戰佢哋有首席射手卡斯歷復出擔正，隨時有驚喜演出。

跌Watt熱刺7日第3戰

當日熱刺班兵睇見梅姆巴暈倒，都表現得憂心忡忡，呢單嘢之後，班保頓粉絲仲當正熱刺係自己人添。可惜，自從慘劇發生後，熱刺近2場英超不勝，被第6位嘅紐卡素愈追愈近，難怪領隊夏利列納都走出嚟講，話如果熱刺入唔到前4會係大災難，畀壓力班球員。問題今晚係熱刺近7日嘅第3戰，有消息指熱刺會派古迪仙尼、後衞賴恩尼爾遜同中場丹尼路斯等副選作輪換，對住鬥心爆棚嘅保頓，隨時有倒灶危機。

英格蘭足總盃賽制

熱刺對保頓為8強戰，和波需擇日重賽。新特蘭對愛華頓則為8強重賽，以一場過分勝負，若法定時間內打成平手，則需加時作賽，再和則互射12碼決勝。