賓菲加「大」得起車路士

猪拉多纳

27/03/2012
文： KIT

車路士來屆歐聯席位危危乎，不過或者可以大想頭啲染指今屆錦標，除咗等「油王」圓夢外，仲可以攞埋下屆入場券。想當年波圖、紅軍都捧過歐聯，兩回合只要調動得宜，加埋有運氣，車仔捧歐聯唔係發夢，今晚佢哋作客葡超賓菲加，由於雙方都攻強守弱，小妹就支持2.25倍入球大！（有線61、64、201、204及中央5台周三凌晨2:45直播）


睇番車路士近期聯賽表現，雖然對住曼城同熱刺都要失分，但表現其實唔差，火力更加唔使擔心，有睇過直播嘅「車迷」都會收貨，正箭頭杜奧巴已經慢慢重拾佳態，史杜歷治亦表明甘心後上作支援。唯一要挑剔就係車仔後防有時失拖，季中加盟嘅中堅加利卡希爾雖然冇入錯貨，仲成日後上取得入波，但就仲要時間同隊友建立默契。

賓菲加中場艾馬刑滿復出

今仗車路士有中場拉美利斯同中堅大衞雷斯倒戈，主帥迪馬堤奧就話佢兩個提供咗好多賓菲加嘅料，照咁睇車路士重唔贏梗？不過小妹又唔係咁睇，賓菲加自從上一圈反勝辛尼特後走勢凌厲，之前喺葡聯盃仲贏埋宿敵波圖，近12次主場仲取得11勝添。


大家都知車路士班後防經常作出核爆式自殺，睇番賓菲加射手奧斯卡卡度素同坐完波監嘅進攻中場艾馬都係鋒線殺手，絕對有機會數番十胡！話晒佢哋有份喺分組賽度踢走曼聯，所以小妹認為呢場係五五波嘅入球騷。


KIT推介：賓菲加（入球大）

有線球彩台主持KIT

電郵：soccer64@cabletv.com.hk PHONE波熱線：1831 678

「歐聯戰略館」開放時間：周二晚10:30至11:45

橫數千軍

賓菲加主場開入球騷

‧今屆歐聯主場不敗。

‧近10場主場得8勝2負，其中8場開大。

車路士入波靠杜奧巴

‧今屆歐聯作客未贏過。

‧射手杜奧巴喺近4場歐聯攻入4球。