祖記穩陣波咬「米」好形細

猪拉多纳

25/03/2012
文： 鄭少偉

意甲今晚有場矚目戲碼，由祖雲達斯主場大戰國際米蘭，兩支傳統勁旅今季嘅表現一個天、一個地，「斑馬軍團」到目前為止仲保持住今季不敗身，今晚主場出擊迎戰近況令人失望嘅國米，照計點都值得秤先多少，小勝應該問題不大，但如果講穩陣，就應該博1.75倍入球細穩喇！（now633台周一凌晨2:45直播）


斑馬兵28場不敗


講真嘅，雖然今場嘅對碰絕對係重量級，最低限度喺意甲係萬眾矚目先，但查實兩隊家陣喺積分榜一隊排第2、一隊排第8，積分差距成15分，就算咁樣唔代表兩隊實力有差距，都起碼反映雙方今季嘅穩定性有好大分別。呢樣亦係「亨利」今場決定撐祖雲達斯嘅一大原因。


不過，今場「亨利」認為入球細先係首選，事關祖記雖然今季踢咗28場保持不敗，但都唔足以令佢哋坐到榜首位，就證明係有不足，而「亨利」就認為同踢法太重防守有關。28場聯賽勝和各得14場，明顯鋒力唔夠銳利，胡仙歷同馬治斯奧輪流死火，以致好多時面對實力次一級玩死守嘅對手，都攞唔到乜嘢着數，好似之前對基爾禾同熱拿亞咁，一律都畀對手守死，淨係失呢啲分都失到傻啦！

國米前鋒死晒火

祖記鍾意踢守勢波，國米就衰在前鋒死晒火，有報道話上場連阿特蘭大都贏唔到之後，激到老細莫拉堤生蝦咁跳，半場已經忍唔住衝落更衣室喪插班兵，照計今場班球員都會醒醒定定。可惜無論係柏仙尼定科蘭，全部都好似唔記得點射波咁，淨係靠迪亞高米列圖一個，作客祖記好難搵到食，今場焗守住嚟踢！睇怕近排已經聞到魷魚香嘅教練雲尼亞里，今場都唔敢亂嚟，希望守到1分止止血先，捧入球細就啱數喇。


不過如果鍾意玩盤或W嘅朋友，「亨利」就會撐主隊，皆因佢哋好多球員賽前都表明唔會睇小落難嘅國米，好似基亞連尼就強調無論兩隊聯賽積分相差幾多，國米始終係國米，加上對手雲尼亞里係有料教練，絕對唔會輕易放棄，所以佢同隊友都一定會打醒十二分精神去搏命，值得睇高少少。

橫數千軍

祖記近戰勁開和

‧近8仗聯賽得2勝6和，6場和局全部開細。

‧仍然係歐洲5大聯賽唯一一支不敗球隊。

國米作客入波少

‧近3次對祖雲達斯都未能取勝。

‧近10場作客聯賽，得1場入多過1球。