波童另類創富坊

猪拉多纳

25/03/2012


首名入球

推介︰柏比斯施斯


今日得兩場開「首名入球」，心水係英超西布朗對紐卡素，吼柏比斯施斯（上圖）。《東方波經》名家蘇斯黑柴話佢喺効力德甲弗賴堡時已經證明係頂級射手，好嘢梗係要揚出嚟益吓大家。柏比斯施斯非國盃後加盟「喜鵲」，跟同胞丹巴巴亞以及尼日利亞射手森美艾美奧比嘅「黑色組合」極有默契，上半季丹巴巴亞係咁入，依家就輪到柏比斯施斯，相信佢好快會受到強隊青睞，到時「首球」就冇咁好分頭。


（有線300及200台周日晚11時直播）

第一隊入球

推介︰烏德勒支


荷甲荷華高斯主場鬥烏德勒支，主隊上周中於荷蘭盃淘汰阿爾克馬爾，球員仍然沉醉於勝利之中，加上踢足一百二十分鐘體力受損。烏德勒支近期作客贏過阿積士及打和飛燕諾，表現唔失禮，絕對有力成功搶分。荷華高斯對上五場聯賽都係先失波，第一隊入球揀2.68倍「客隊」夠分頭。（周日晚8時30分開賽）

總入球

推介︰迪安3球

法甲來到季尾搏拳階段，唔少球隊踢法都變得較進取，迪安仍需搶分，佢哋對上五場聯賽有四場開大盤，總入球都係「3」球。對手卡昂比佢哋少一分，同未擺脫護級漩渦，卡昂近五場有兩次開「3」球，如非上周對聖日耳門於補時階段失守，好大機會又開一場，總入球「3」可以一試。（周日晚11時開賽）

單雙

推介︰熱拿亞單

意甲球隊熱拿亞今季聯賽以開「單」次數較多。若純計聯賽主場的話，熱拿亞開「單」比率更超過六成。至於費倫天拿方面，今季和波次數唔多，亦係一支較利開「單」嘅球隊。另外對賽成績方面，雙方近五次對賽有四次開「單」。數據或攤路上都偏重喺「單」。

（周日晚9時開賽）

大細

推介︰史特加大

見到史特加，真係場場都大大鑊，雖然今仗有伊比斯域同岡崎慎司缺陣，但前線仍然有夏歷、卡卡奧同舒希巴等攻擊手壓陣，配合主帥拉巴迪亞的主攻打法，入球唔慌少。雖然對手紐倫堡好守得，但翻查紀錄，原來兩軍交手通常都大手交易，近六次對壘有五次開大，場均入三球，現時個大仲有1.82倍，非常抵買。

（有線61台周日晚9時30分直播）

讓球主客和

推介︰拿玻里「讓球主勝」

意甲拿玻里主場鬥卡坦尼亞，吼「讓球主勝」。拿玻里歐聯出局後可專心踢聯賽，目前僅落後第三拉素一分，為爭取來屆歐聯資格必搏。拿玻里剛輕取錫耶納，箭頭卡雲尼大勇，主場威力又勁，唔止贏一粒。卡軍近期表現雖不俗，但對手一係實力曳，捧「讓球主勝」啱數。（now 633周日晚9時直播）

半場主客和

推介︰柏達邦半場和

德乙柏達邦主場對杜伊斯堡，推介半場和。柏達邦雖然排名遠高於對手，但唔代表佢哋可由頭贏到尾。柏軍一向表現慢熱，特別係主場更周時老鼠拉龜，今年四仗主場全部開半場和。杜伊斯堡近況明顯轉好，今場有力一戰，而且佢哋亦興睇定嚟踢，近四仗都開半場和。而且主隊射手普舒域斯傷勢剛愈，柏軍更難咬得入客軍，吼半場和啱數。（周日晚7時30分開賽）

半全場

推介︰FC悉尼和主

澳職FC悉尼主場對紐卡素噴射機，將決定最後一張季後賽入場券誰屬，噴射機打和就能進身季後賽，預料會屯重兵死守。反觀FC悉尼要入季後賽，則非勝不可，肯定採取主動，但礙於攻力一般，上半場未必咬得入噴射機，可考慮捧「和主」。FC悉尼比較慢熱，近九仗上半場只入兩球，好難期望今仗迅速入波，特別係客軍應會加強防守，FC悉尼想入波更難。不過FC悉尼始終有地利，而且久守必失，噴射機未必可以頂到最後。如睇好FC悉尼贏波入季後賽，可考慮博5倍「和主」。

（周日下午1時開賽）