老婦人艷壓打呲

猪拉多纳

25/03/2012
文： 巨高

米蘭雙雄近年壟斷意甲，連續幾季冠軍非此即彼，不少球迷對此早已極度不滿，希望有球隊可以企出嚟推倒霸權，令意甲更加公正公開。趁今晚意甲國家打吡，東道主祖雲達斯會將球迷不滿情緒轉化為能量，為公為私都要砌低國米。今季祖記徹底拋開「電話門」陰霾，於聯賽仍保持不敗之身，「老婦人」魅力尤勝舊時，「讓球主勝」值得信賴。（now 633周一凌晨2時45分直播）

祖記誓雪前恥

自○六∕○七年球季，意甲寶座從未離開過米蘭市，其中國際米蘭更贏過五次之多。國米可以咁威水，全因球隊當年藉「電話門」醜聞為由，向意大利足總索回祖雲達斯冠軍資格。本來意足總有意將冠軍一欄「留白」，不設冠亞季。但國米態度強硬，老闆莫拉堤係都要將祖記獎盃搶到手中，為免事情愈鬧愈大，意足總最後惟有就範。


對於國米行為，「老婦人」至今仍深深不忿，球迷更批評國米係下流小偷，趁亂打劫。鑑於祖記當時勢弱只有死忍，但今時唔同往日，經過管理層多年艱苦經營，「老婦人」已重拾昔日吸引力，唔止聯賽交到成績，喺轉會市場仲相當豪氣，要邊個就買邊個，真係講句嘢都大聲過人。

國米團火就嚟熄

相反國米近年開始縮皮，以前莫老闆買球員，從來都唔睇價錢牌，出手闊綽令人咋舌，但現時已豪氣不再，仲衰到拉大隊去中東傾贊助。佢老人家亦開始「回塘」，球隊演出衰到貼地（落後榜首AC米蘭19分），都唔敢炒教練雲尼亞里，你就知莫老闆心中嗰團火早已熄滅。此消彼長，祖記必把握機會一鋪打謝「藍黑兵團」，以洩心頭之恨。唔好忘記，祖記目前只落後榜首AC四分，今場定必喺新球場打落水狗。