阿聯無心戀戰雄心平手秤先

猪拉多纳

23/03/2012
文： Kit

今季總共有3隊澳職球隊去踢亞冠盃，共通點就係兼顧唔到兩邊戰線囉，顧得頭又顧唔到腳！排榜首兩席嘅中岸水手同布里斯班獅吼最近喺澳職多次令大家損手；而排第9嘅阿德萊德聯就更加專攻亞冠盃，今日主場對墨爾本雄心睇怕都唔會點搏命，平手盤我捧1.84倍雄心。（有線64、204周五下午5:00直播）


周中「阿聯」主場贏大阪飛腳2:0，報番當年決賽輸波之仇！佢哋憑住丹尼爾慕倫後上接應死球，呢位後防大將確實係頂得之人，結果佢更梅開二度，表現神勇。

雄心回勇5戰不敗

不過返澳職呢隊波又無咁醒，最近5戰得1和4負，講入波就只得小將藍斯曾經攻入獅吼一粒！其實「阿聯」喺聯賽度已經「無欲無求」咗好耐，今場雖然係佢哋今季澳職煞科戰，但教頭高斯米拿表明球隊要全程投入亞冠盃，球員當然唔會搏盡，避免受傷啦！


雄心方面形勢亦相對簡單，今日只要唔大敗4球以上，就可保住季後賽資格。不過既然主隊已經無心戀戰，而雄心高佬前鋒伊利巴巴積最近又着晒火，加埋杜簡錫支援，火力有保證。曾經喺阿積士打滾嘅領隊雲斯捷前排宣布教埋今季就拜拜，臨別秋波，佢最大心願就係帶領球隊歷史性打入季後賽。球隊最近上下一心，克服早前8場不勝嘅低潮期，近5場聯賽有2勝3和不敗，平手盤小妹一於捧雄心。


KIT推介：墨爾本雄心（平手）

有線球彩台主持KIT

電郵：soccer64@cabletv.com.hk

PHONE波熱線：1831 678

「球盤龍門陣」開放時間：周五晚10:30至11:50