馬拉加有「歷」連勝

猪拉多纳

22/03/2012
文： 查理阿蛋

「西甲曼城」馬拉加最近愈戰愈勇，上場作客巴拿貝球場居然可以攞走1分，實在令人拍爛手掌，今次回歸主場鬥華歷簡奴，讓半一絕對有力開出上盤o架！雖然話華歷簡奴勢頭唔弱，但係馬拉加今季主場除咗輸畀皇馬、巴塞之外均保持不敗，今場要全取3分爭取歐聯席位應該冇問題。（now632台及廣東體育周五清晨5:00直播）


馬拉加喺聯賽主場4連勝，令班波嘅歐聯夢有機會成真！就算杜蘭拿有傷唔出得，唔好忘記後防大佬迪米捷利斯喺拜仁時代都成日踢中場，上場對皇馬佢同伊拿斯奧甘馬曹拍檔效果唔錯，雖然佢講笑話自己體能唔多夠，但係對華歷簡奴未必要打太多守勢波，小妹對佢就相當有信心啦！

辛迪卡索拉又入自由球

上場馬拉加對皇馬搶分成功的確令人驚喜，但係迪米捷利斯就講明唔會因為咁而自滿，所以今場一定會去到盡唔會輕敵，至於對皇馬射入靚罰球做英雄嘅辛迪卡索拉，今季已經憑自由球直接攻入3球，比沙維仲多1球成為西甲「自由球之王」，今仗分分鐘可以再表演絕技o架！

華歷簡奴作客失波多

華歷簡奴近況亦相當唔錯，可惜上場作客畀愛斯賓奴大炒5:1，搞到歇冬後嘅客場不敗走勢終結，信心受到打擊，今次造訪馬拉加真係冇咩把握，佢哋近6場聯賽作客都有失波，其中更有4場至少失3球，反映後防唔多穩陣，咁啱主隊射手荷西朗頓近排表現可人，要喺華歷簡奴條豆腐渣防線搵食，又點會難到佢先？