沙士菲「-1」起筷

猪拉多纳

22/03/2012
文： Mic少

想賭波贏錢，最緊要做足功課，有人會睇往績、留意軍情，但講到投X南美自由盃，一定要熟讀地理。南美洲幅員遼闊、地勢分差好大，G組厄瓜多爾球隊基多靠高原主場搵食，但一離開自己地頭，就完全冇料到，佢哋今輪作客阿根廷球隊沙士菲，好可能任人魚肉，大敗收場，一於直取「讓球主勝」。


（周五早上6時45分開賽）


雙方月初交手，基多憑海拔九千多呎高原主場優勢，大勝沙士菲三比○。沙士菲球員既憤怒又無奈，因為佢哋喺稀薄空氣環境下比賽，體力消耗特別快，否則唔會大敗。沙軍認為上次係輸畀高原氣候，自然深深不忿，今仗回主場要證明身價，梗係有仇報仇，主W熱爆只有1.2倍，明顯屬於大炒格。


事實上，沙士菲主場威力相當強大，近四次主場全勝，包括贏同組墨西哥球隊瓜達拉哈拉三比○，要淨贏作客蟲基多兩球或以上，相信問題不大。基多之前作客同組最弱嘅迪芬沙士砵亭，都吞兩蛋，今仗隨時輸得更甘。

A組山度士「大」炒格

另外A組賽事，山度士主場對秘魯球隊祖安奧列治，祖軍喺分組賽三戰三敗，擺明未夠班於自由盃爭雄，反觀巴西勁旅山度士攻強守弱，主W得1.12倍冇味，寧取入球大。（周五早上9時開賽）