國米質高主W冇「蘭」度

猪拉多纳

18/03/2012
文： 郭球奇

無疑國際米蘭啱啱喺歐聯出局，但其實唔壞得晒，至少嚟緊可以專心打意甲，今晚喺聖西路主場對住一向恰慣、兼有主力後衞受傷嘅阿特蘭大，絕對係因應會長莫拉堤最新指示今季要殺入前3、展開追分序幕嘅好機會，1.5倍主W值得熱捧！（開賽時間：周日晚10:00）

國際米蘭Vs阿特蘭大

國米日前喺歐聯16強主場贏馬賽2:1，可惜兩回合計打成2:2，因作客入球優惠出局，今季極大機會四大皆空，但會長莫拉堤隨即就為隊波訂定一個新目標：「我哋要爭取殺入聯賽前3，保住歐聯參賽資格，雖然難度唔細，但我相信只要班球員肯搏，就有機會。」雖然國米目前喺意甲跌到落第7，好彩其實落後第3位嘅拉素只有8分，唔係冇機會追o架！

阿特蘭大卡佩利提早收咧

「藍黑兵團」日前對馬賽有中場史奈達拉傷右腳大腿肌肉，而且另一進攻中場列卡度艾華利斯又未好番，所以國米今仗會由踢開嘅4312陣式轉踢442，不過國米班球員始終有質素，相信影響唔大，何況射手迪亞高米列圖近況大勇，連續3場有波入，主場出擊勝算仍然好高。


對家阿特蘭大近況亦唔曳，保持咗5場不敗，可惜喺呢個士氣高昂嘅時刻，本來就快復出嘅後防大將卡佩利竟然喺練波時再受重創，宣布今季提早收咧，對佢哋嚟講絕對係一個噩耗，再睇埋阿特蘭大近6次作客聖西路全敗，相信佢哋嘅「神奇之旅」今晚係時候告一段落。

阿特蘭大近6次作客國米全敗

日期 戰果


10/04/25 客負國米1:3

09/05/31 客負國米3:4

07/11/24 客負國米1:2

06/12/23 客負國米1:2

05/02/16 客負國米0:3

05/02/02 客負國米0:1