史浩克客Ｗ撳住拎

猪拉多纳

18/03/2012
文： 蘇斯黑柴

德甲頭場包尾大幡凱沙羅頓主場迎戰史浩克04，主隊近期獨沽一味死守求和，但面對鋒線着晒火嘅史浩克好難守得住，黑柴捧1.88倍史浩克客Ｗ。


（有線61及201台周日晚10時30分直播）

亨特拉爾今季已入37球

凱沙羅頓今季大失血，上季四大攻擊主力伊利斯域、拿傑、莫拉域克同賀化一個不留，搞到淪為德甲攻力最差球隊，到家陣踢咗25輪聯賽入得16球，比起入球能力第二差嘅奧格斯堡少9球之多，排包尾都冇得好怨，佢哋今季嘅前鋒得兩個人入過波，但首席射手舒捷達唔受教練古斯重用，另一射手高文夏又傷埋，古斯堅持倚重來自不來梅嘅辛度華拿同漢堡出身嘅蘇古達柏素，呢兩位攻擊手小時了了，但到今日已經一再證明係失敗青訓產品，兩人加盟至今都未立寸功。凱沙季初曾經作客爆冷贏過史浩克2:1，但其中一個入球係12碼，另一球由高文夏取得，今晚想再入史浩克波都幾難。


凱沙已經連續15場聯賽未贏過，歇冬後踢咗8場只入得3球，前面入唔到波，古斯唯有採死守消極踢法，但求有破壞冇建設，近兩場先後悶和禾夫斯堡同史特加，既然有甜頭今晚當然照辦煮碗，不過面對大勇嘅史浩克相信好難再搶到分。史浩克啱啱喺歐霸盃次回合以4:1反勝川迪殺入八強，狀態弗爆，前線有亨特拉爾、魯爾同法芬等星級攻擊手，加埋潛力無限嘅賀治比同達斯拿合作攻堅，無論級數同攻擊點，都唔係禾堡或史特加之流可比，尤其對川迪連中三元嘅亨特拉爾，今季喺各項賽事已經為史浩克轟入37球，比聯賽射手榜領先嘅馬里奧高美斯仲要多，凱沙防線好難頂得佢住。