車仔「-1」奪城

猪拉多纳

18/03/2012
文： 蘇豪

英格蘭足總盃八強戰有場強弱懸殊之戰，英超豪門車路士今晚主場對英冠仔李斯特城，「車仔」日前歐聯打出今季最精彩一戰，「影子主帥」泰利成功平定內亂，全軍上下踢來充滿激情，今次就算收起部分主力都可望大勝一場，大盤同「讓球主勝」可雙投！


（now 671及672周日晚10時05分直播）


車路士辭退教頭保亞斯後，看守教頭迪馬堤奧領軍取得三連勝，包括上場歐聯擊退拿玻里晉級，老臣子射手杜奧巴及林柏特等打出水準，球隊踢得簡單直接，效果理想。


「車仔」能夠重上正軌，迪馬堤奧固然有功，隊長泰利擔當將帥溝通橋樑角色，場內場外出力教路，有如「影子主帥」，絕對屬平定內亂頭號功臣。


車仔於歐聯打足百二分鐘贏波，眾星情緒高漲，之後拉大隊夜蒲至凌晨，有人擔心球員未回到氣。不過，車路士球星一向爛玩爛蒲，以往於莫連奴任教時期經常狂歡照樣取得佳績，家陣隊內氣氛一流，唔使擔心太多。由於大軍下場聯賽要硬撼曼城，杜奧巴及林柏特等今晚或會抖抖，正好提供機會畀射手費蘭度托利斯打破入球荒。

李斯特城未夠班偷雞

李斯特城人腳於英冠唔差，但拍埋英超嘅車路士始終差一大截，射手碧福特及紐根特之前於英超搵食冇料到，今場作客史丹福橋亦難望偷雞。兩軍○七年曾於英聯盃碰頭，當時「車仔」以四比三力克李斯特城，今次再度交鋒，相信戰情冇咁激，預期車路士可「大」勝，仲可以捧埋「讓球主勝」！