拜仁弗爆「哈」蝦霸霸

猪拉多纳

17/03/2012
文： 力奇

狀態大勇、近兩仗轟入14球嘅拜仁慕尼黑今晚喺德甲出訪護級分子哈化柏林，就等同一架全速嘅火車，撞落個暈咗嘅病人身上，後者實死冇生。拜仁作客讓波都冇有怕，1.75倍「讓球客勝」唔難手到拿來！（有線61、64、201及204周日凌晨1:30直播）


拜仁近兩仗分別喺德甲狂炒賀芬咸7:1，然後再喺歐聯蹂躪巴素利7:0，除咗射手馬里奧高美斯喺呢兩仗入7球弗爆外，超級雙翼洛賓同列貝利又係狀態冇得彈，湯馬士梅拿長期高水準，最緊要係中場大腦舒韋恩史迪加傷愈復出，想贏波根本話咁易。


至於目前排聯賽榜尾3嘅哈化，深陷降班漩渦。自從踏入2012年開始，聯賽8戰輸咗7場，狀態衰到貼地。球隊早前換咗名帥「奧圖大帝」利赫高執教，雖然呢位戰術大師過往曾經18次擊敗拜仁，但正所謂巧婦難為無米炊，佢接手班波踢3場都只係得1勝2負，未見起色，今晚佢哋仲有中場高拜亞韋利停賽，實力銳減，對住要搶分追「一哥」多蒙特嘅拜仁，想輸少球都難啦！