西維爾「大」起巴塞

猪拉多纳

17/03/2012
文： 鄭少偉

今晚西甲又有好戲上演，由西維爾主場迎戰歐聯八強分子巴塞隆拿，「地上最強」呢幾日有消息話教頭哥迪奧拿好快就會同巴塞續約玩多一季，一班巴塞球員同球迷當然相當高興喇，不過主隊西維爾主場出擊都一定去到盡，今晚必有場龍爭虎鬥，亨利熱捧1.48倍入球大！（now632台、廣東體育周日凌晨3:00直播）

巴塞聯賽冇得追試新仔

巴塞近幾場霸氣再現，連埋歐聯在內唔經唔覺已經6連勝，而且教頭哥迪奧拿續約在即，咁多利好消息，當然值得睇高一線。不過佢哋同死敵皇馬嘅積分仍然有一大段距離，後上拎聯賽冠軍嘅機會相當渺茫，如果你係哥迪奧拿睇怕都會疊埋心水，爭歐聯同西班牙盃冠軍好過啦！


哥迪奧拿近幾場聯賽嘅部署唔算Hea，不過亦無謂去到咁盡，事關陣中傷兵一大堆，好似韋拿已經長抖，阿歷斯山齊士同堤亞高艾簡達拿啱啱先復操，歐聯家吓打到入8強，兵源咁緊絀，當然唔想冒險再添傷兵，倒不如畀新血艾錫古恩卡及基斯甸泰路吸收吓經驗仲實際！好彩呢兩個細路都有貨派，周不時取得士哥，加埋球王美斯嘅神技，巴塞嘅攻擊力依然強勁。

西維爾作客魯營都唔輸

主場嘅西維爾一樣唔嘢小，起碼首循環作客魯營對住巴塞都可以和波執番1分，巴塞主場13場聯賽贏足12場，只係畀西維爾逼和過1場，證明「剋星」西維爾對住巴塞特別醒神，今晚喺主場惡得起，大有機會同巴塞上演入球騷，一於等睇入球大戰啦！

橫數千軍

西維爾近戰旺開細


‧近6次主場對巴塞只贏1場。

‧對上5場比賽有4場開出入球細。

巴塞穿窿易失波

‧近7場只得1場可保不失球。

‧現時聯賽4連勝為今季球隊最長連勝。