熱刺輸到慌保頓仲抵博

猪拉多纳

17/03/2012
文： 江忠德

呢排好興講民望，連邊個做英格蘭新領隊都要以民意作依歸，先排民望高企嘅熱刺領隊夏利列納，因為英超3連敗搞到冇乜聲氣，依家熱刺狀態咁低迷，喺英格蘭足總盃遇上經常扮豬食老虎嘅保頓，想極速反彈都幾難。（now671、672台及廣東體育周日凌晨1:30直播）


由作客慘敗畀阿仙奴到輸畀愛華頓，熱刺無論係氣勢同運氣都輸晒，亦係夏利列納執教呢班波以來首次3連敗，連力挺佢做三獅新領隊嘅捧場客都收晒聲。

列納盃賽用人有保留

熱刺喺英超只係多第4名嘅阿仙奴1分，第3位岌岌可危，難怪喺足總盃8強賽前夕，都要分心諗吓英超。佢哋上輪要踢到重賽先淘汰甲組仔史提芬納治，我都有旁述呢場波，好明顯見到夏利列納喺盃賽用人好有保留，連球員本身都冇話去到盡，咁嘅心態對判輸嚟踢嘅保頓，好難予取予攜。


保頓依家排喺聯賽榜尾4，如果呢隊蠱惑波唔使護級先至係奇事，但佢哋喺季季去到尾都會逢凶化吉！出晒名飄忽嘅保頓可以無端端輸畀弱隊，不過亦曾贏過紅軍同踢和阿仙奴，家陣喺足總盃明刀明槍，又遇着熱刺近況低迷，力求爆冷之餘，起碼唔會踢得難睇。

英格蘭足總盃賽制

今輪為8強戰，若法定時間內打成平手，均需擇日重賽。重賽若再打和，需加時30分鐘，再和則互射12碼分勝負。